මාධ්‍ය වාර්තාකරණය සහ වගකීම

                                   

    මාධ්‍ය සහ ජනතාව අතර තොරතුරු හුවමාරුවේ දී සම්බන්ධීකාරකයා ලෙස වගකීම පැවරෙනුයේ මාධ්‍යකරුවටය. එකී කාර්යේදී අවශ්‍ය තොරතුරු නිවැරදිව සහ සත්‍ය බවින් යුතුව මහජනයා අතට පත් කිරීමේ ප්‍රබල වගකීම මාධ්‍යකරුවා සතු වේ. සාර්ථක තොරතුරු ගලනයකට නම් මාධ්‍යකරුවා සෑමවිටම උපක්‍රමශීලීත්වයෙන් සන්නද්ධ විය යුතුය.

              

          වර්තමාන ලංකාවේ මාධ්‍ය කලාව විපරම් කර බලන කළ බොහෝ මාධ්‍යවේදීන් සිදු කරන්නේ හුදු වාර්තාකරවන්ගේ භූමිකාව පමණක් බව පැහැඳිළි වන්නකි. මාධ්‍ය වාර්තාකරණය යන්න ගවේෂණාත්මක වාර්තාකරණයෙන් යුතුව විය යුතුවකි. විවාදයට බදුන් විය හැකි , හඬක් නැගිය හැකි තැන් හිතාමතාම වසා තබමින් හුඩු මතුපිට වාර්තාකරණයට පමනක් අතපෙවීමට මාධ්‍යකරුවන් උත්සුක වෙයි. ස්වකීය ජීවනෝපාය බේරා ගැනීමට කුමක් හෝ ලිවීමට නැතිනම් කිමට , පාලකයන් වෙනුවෙන් පෑන භාවිත කිරීමට හුදෙක් මාධ්‍යකරුවන්ගේ භූමිකාව වී හමාරය.

             

           ප්‍රජාතන්ත්‍රවාදය පිළිබඳව කුමන ප්‍රවාද ගොඩනැගුවද සත්‍ය වශයෙනම අප සිටින්නේ යටපත් කරන ලද සමාජයකය.හිටිගමන් හාල් මිල , එළවලු මිල ඉහළ යන ඊළඟ මොහොතේ ගොවීන්ට එළවලු ටික විකුණා ගැනීමට නොහැකිවන , හොර භාණ්ඩ නැව් නගින ආර්ථිකක ය. දූෂණයට ලක්ව මිය යන සිඟිති දරුවන් ගැන වාර්තාවන සමාජයකය. දරුවනට පාසල් ලබා දෙන්නැයි දෙමාපියන්ට හඬ නැගීමටවන අධ්‍යාපන ක්‍රමයකය. එපමනක් නොව සරසවි සිසුන්ට පන්තින තහනම්වන වාතාවරණයකය. මේ සියල්ල පිළිබඳව ගැඹුරු ගවේෂණයක් සිදු විය යුතු , කලුවරේ අත්පත ගාන්නක් වගේ මතුපිට පමණක් නොව ගැඹුරු හරය උත්පාදනය කොට ගැනීමට මාධ්‍ය වාර්තාකරුවන්ට වගකීම පැවරේ. මේවා දැක දැන තවත් අඳ , ගොලු , බිහිරන් සේ සිටිය යුතු නැත.

             වර්තමානයේ මහා ඉහළින් කතා කරන මාධ්‍ය නිදහස යනු සෑම දෙයකටම කැමරාව අල්ලා මතුපිට් පෙනෙන්නට තිබෙන දෑ තමන්ට රිසි පරිදි වාර්තා කිරිම නොවන්නේය. එසේ නම් එය වල් බූරු මාධ්‍ය නිදහසකි. මාධ්‍යවේදීයා දූෂිත වීම යනු ජන මනසද දූෂණය වීමයි. එ ජන චින්තනය ගොඩනැගීමෙහිලා තැනක් මාධ්‍යකරුවාට පැවරෙන බැවිනි. 

                   මාධ්‍ය නිදහස භුක්ති විදිමින් රටේ ඉදිරි ගමනට අත හිත දීම මාධ්‍යකරුවාගේ වගකීමකි. නමුත් යහපත් දේ අභිබවා අයහපත් දේ  ජනතාවට ලගා කර දීමට මාධ්‍යවේදීන් දැන් දැන් යොමු වනු දක්නට ලැබේ. රාජ්‍ය සහ දේශපාලන තොරතුරු ජනතාගත කිරීමේදී රටේ ඉදිරි ගමනට බාධාවක් නොවන සහ ජනතාව ප්‍රකෝප නොවන ලෙස කටයුතු වේ නම් එය උචිටය. 

           යමෙකුගේ පෞද්ගලිකතවයට හානි කිරීම සදාචාර විරෝධය.එකී වරදින් ජනමාධ්‍ය මුදවා ගැනීමට හැකියාව පවතින්නේද ජනමාධ්‍යකරුවාට ය. පුද්ගයන්ගේ පවුල් ජීවිතය ආශ්‍රිතව සන්වේදී රහස් මාධ්‍ය හිමිකරුවන්ගේ සහ කතුවරුන්ගේ බලකිරීම මත පල කිරීමට මාධ්‍යවේදීන්ට සිදු වේ. එවන් අවස්තාවල තම රැකියාව ආරක්ෂා කර ගැනීමට මාධ්‍යවේදීන් කටයුතු කළ ද පුද්ගලික ජීවිත මාධ්‍ය මඟින් අනාවරණය කිරීමෙන් වන භයානක තත්ත්වය පිළිබඳ මාධ්‍යවේදීන් අවබෝධ කොට ගත යුතුය. බල්ලන් මරා හෝ සල්ලි සෙවීමේ න්‍යායට නතුව ආත්මය හකුලා සාක්කුවේ දමා ගැනීම මාධ්‍යකරුවන්ට උචිත වන්නේ නැත.

        මිනිසාගේ පරම යුතුකම වන්නේ මිනිසාට සේවය කිරීමයි. ඉදින් මාධ්‍යවේදියා ද මිනිසාගේ අභිවෘද්ධියට මිස පරිහානියට කටයුතු නොකල යුතුය.

                          

                                                                  නිසන්සලා තෙන්නකෝන්